In The Beginning V ''Ants Nest''

Ants Nes

While me and Balle still a work a white wash , Clyde tun a rich schoolers overnight , Pigin Toe madda find a new man and mi lost the indian head ring Mr Camfah gi mi fi wear-

Pigin Toe madda and one girl name Mitsy from cross back bush start go a Port Royal a sunday day time, sometime when mi mother look out and see dem a pass she come in back a laugh because she always say dem starch up dem clothes dem clothes and feva cassava starch ginnygog. Mitsy di people dem always a whisper and say she a lady of the night so when Mumma Pigin did start walk wid har di whole a ville did ina frenzy a wonder is what mek dem start walk together

Me , Clyde , Ballie and Pigin tek we common entrance , I did feel good because everyting we teacher show we did deh pan especially di Maths paper. Di Multiple Choice did easy and di English did boring . Clyde finish him work when we done and di whole a we say we a go a Creamy Corner go eat ice-cream. Wid him head a hang dung same way him say di big man a come fi him. We go buy ice-cream and a head up back di road fi go home and see dis coolie plum tree and Ballie decide say him gwine brave di makka dem and climb it and pick plum and say we di wait pan him

Ballie ketch ina di coolie plum tree and a nyam plum and not even throw dung one gi we all di beg we a beg him. When him feel him did done eat and a depart di tree makka tear him shirt dung di back and two wasp bite him pan one eye. My madda always say God always fine punishment fi tite hands.. Ballie neva waa no more plum everyone whey ina him pocket we get dem cause him did a bawl and him know him did a go get a beating fi di shirt pan tap a dat when him go home-


Mrs Bertram finally put out Clyde fawda and him and him nex bredda start stay up and di big man house and only come home pan weekends. Mommy ask har why and she tell har say di big man did waa help har out since har husband gone. The third weekend Clyde bredda come home not even Road Runner hot-dog cudda get him fi go back, Mrs Bertram ask him why him neva waa go back and all him did a do a bawl and neva waa ansa. Dem send a nex one a Clyde bredda and him run whey ina di week and come back. Only Clyde did stay because him say him did feel rich when him up deh and plus him neva haffi sweep up no yard or go a shop. The first bredda whey go wid Clyde did end up ova Childrens Hospital because Mrs Bertram say him keep on a bawl out ina him sleep and a hold him pants it did get so bad dat him stop talk so dem admit him up a childrens fi a while.

Mumma Pigin come home one day wid a white man ina full white and introduce him to my mother as har future husband. She tell Mama she meet him a Port Royal and him was a good man whey waa tek care a she and har children. Him say him did come from Norway. Him was a tall white man wid blond hair and very quiet, most evenings him wudda come sidung pan di varanda chair and put one leg over the chair and jus a look so. Mumma Pigin used to carry him food come pan a tray come give him. One bowl wid di meat , a nex one wid di rice and a nex one wid gravy. My madda say di man did a live ina style because more time we cudden find di meat muchless rice and him did a eat outa not one but chree plate. The evening when Ballie madda beat him di white man hear and him run like teef reach all di way down Moutainview Ave , a talk ina one language I neva undastan. Ballie madda feed him wid lick till di wasp bite dem start bleed because a di tear shirt whey him come home wid. Likkle him did know say Pigin toe did in fi a worse beating because Pigin was a teef di man money outa him brief case and Mumma Pigin put him hand dem pan di stove.

Di big man from Headquarters was still a pick we up until one morning him ask mi if mi want to come up a him house fi Summer Holidays. I say yes because I did glad fi get whey from dem poor people deh a ville fi a likkle while. Di bigman tell mi dont bring any clothes him wudda buy all mi want