In the Beginning PART II

Mi reach home, gi mommy some a di money and keep $1 fi miself fi buy mi lastic dem and ting. Mommy buy chree poun a c.back and kentucky it wid some rice and butta. Mi eat big and drink a nice long glass a sugar and water.


My sister whey name Pookie say har fren a school have pardna and mi decide fi go ina it . Fifty cents a week. Because a di work mi go in wid two han. Now if di big man even wet up all mi face mi feel like a nuh nuttin cause two hand a pardna a week a go buy mi a new crep come December.

Monday morning, me ,Pigin Toe, and Clyde lef out and cut cross Swallowfield fi drop out pan Oxford Road and walk go dung, when we a walk Pigin Toe open out him bag and a show all a him lastic dem whey him buy wid di white wash money, out drop orange guts, chewey cham paper, and one ten-cent bulla. Pigin Toe say him neva a give him madda fi him money .

Now Pigin Toe was kind of a chubby youte wid a kak battam and walk wid him foot dem turn in.. das why di people dem call him so. Is Yoot whey put him belly first comes what may him haffi eat. And him madda was di same way. Sometime we used to share one dutty gyal fi di whole 5 a we but every Sunday dem used to eat dem rice and peas n chicken wid dem vegetable pan di side. Pigin Toe mother had six kids, two were chinese, and four were indian looking. The man she lived with and that was told he was the father was a tarry black man, so black you cudda hardly see him eye dem. But madda Pigin did brown wid bow-legs and she did have a nice shape. Most evening she used to dress and go up a Headquarters or go Port Royal or go a Dutty Rub Up a Cross Road.

While we still a walk go down the mi see the Escort pull up beside us and the Big Man from Headquarters ask mi we if we need a ride. I run fi di front seat because I hardly used to go ina cyarr and I did waa know how a cyarr work. Pigin and Clyde tek di back seat . Di Big Man drop we off and ask mi if I get any lunch money and mi say yes but him still give mi $5 . Mr Abrahams open ina di week so I can go evening class. Mommy mus glad . My mother was di type a woman whey always tell we nuffy eat from we neighbor and she always  squeeze lime a di door way before we step out a morning time. She was neva di one fi talk to whole heep a people because she always say badmine sour more dan lime. So I never even mek she know bout di man from Headquarters because she always say dont tek money from people because dem mite a try bun you hand.



--